محمد ياسيد الخلق ياأكرم الأكرمين
تعالى ياسيدي شوف ماآل إليه من بعدك حال المسلمين
هما دول إلي هاتتباهى بيهم يوم الموقف العظيم؟
إسألهم ياسيدنا كانوا بيدبحوا عباد الله على مذهب مين؟
أصل الجهاد دلوقتي ياسيدنا بقى له تنظيم وأصحابه أمراه
قاعدة واسامي جيوش على سيوف وشعارهم القتل فرض وسنة
هما ولاد أبونا وأمنا وجواه عروقهم بيجري نفس دم الأمة
بكتاب ربهم وسنة نبيهم ماتعرف جاهلين ولا متجاهلين
إنما والحق يتقال على صلاة الجمعة دايما متوضيين ومحافظين
ويقولوا بسم الله الله أكبر قبل القتل وبعد القتل هدر الدم في شرعهم من صحيح الدين
والقرأن في التاكسيات والقهاوي شغال الله ينورعلى طول ومااكتر إلي له سامعين
والحمدالله ولا كلمة من كلام ربنا الناس دول فاهمين
رحمة الله عليك يامتولي ياشعراوي
كنت راجل فاضل ولكلام ربك كنت أفضل راوي
مسلمين ياسيدي محمد للأسف مسلمين
والنفس إلي حرم ربك قتلها فجروها بالقنابل وشوهوها بالسكاكين
إلي يقطع شجرة يجي يوم الموقف العظيم
وربنا يصوب راسه في النار وبئس المصير
وإلي يقطع من عباد الله رقبة قول لي يارسول الله ياأمين
القاتل مين يشفع له عند الله مين؟
الله يلعن كل منتحر وقاتل واللهي بريء منكم إسم الشهيد
الله يلعنكم دنيا ودين حتى جثث الموتى مارحمتوهاش سحل وتنكيل
وكأن مفيش أنبياه لدين ربهم كانوا للبشرية في يوم مرسلين
وكأننا بالقرأن والسنة أصبحنا كلنا كافرين
ويقول لك الإرهاب ده إستيراد من الخارج
لاحول ولاقوة إلا بالله يارب يامثبت العقل والدين
يعني هما إلي قتلوا الحسين كانوا من الصين؟
يامنجي من المهالك
ولا يعني كانوا من فرنسا الخوارج؟
ولا كانوا أمريكان إلي إرتدوا عن الإسلام؟
ولاكانوا من اليابان إلي قتلوا عثمان؟
لعنة الله على القتلة والمفسدين
لكن والشهادة لله على صلاة الجمعة دايما متوضيين ومحافظين
ويقفوا بين إيدين المولى ساعة الصلاة في سجود وركوع خاشعين
أستغفر الله من كل ذنب عظيم ولعنة الله على المنافقين
اللهم إني لا أسألك رد القضاء ولكن أسألك اللطف فيه ياأرحم الراحمين
Related posts:
