لازم نسأل نفسنا سؤال مهم قبل مانخلي غضبنا يعمي بصرنا وقلوبنا وبدل مانقف إيد واحدة ضد الإرهابيين القتلة المتطرفين الكفرة نضرب في بعض وهو ده إلي هما عاوزينه
ياأخواني وأخواتي سواء كنتم مسيحيين أو مسلمين الله يرضى عليكم أجمعين فكروا كويس إن القتلة الإرهابيين دول لا يهمهم مسيحية ولا إسلام ولا إنجيل ولا قران ولا مسجد ولا كنيسة هما كل همهم يزعزعوا الأمن في مصر بسياسة فرق تسد عشان يوصلوا للهدف إلي هما طول عمرهم عاوزينه إنهم يحكموا مصر بفرض الرعب والقتل عشان الناس تخاف وتقعد في بيوتها وتحط غضبها على حكوماتها ويخربوا ويضربوا في بعض وبعد كده هما يحققوا مرادهم
الموضوع مش محتاج ذكاء عشان يتفهم الإرهابيين دول عاملين بالظبط زى المغول سلموا تسلموا بيدمروا كل شيء وبيقتلوا كل كائن حي مسلم مسيحي مايهمهمش كل إلي عاوزينه إنهم يستولوا على الحكم ويكونوا إمبراطورية للمتطرفين الجهلة الله يلعنهم ويحرقهم مش مهم جنسيتهم إيه في النهاية هما قتلة وإرهابيين والإرهاب لا له دين ولا وطن ولا جنسية
يامصريين أوعوا تخليهم ينجحوا في إلي هما عاوزين يوصلوا ليه لازم كلنا نقف وقفة راجل واحد ضد القتلة دول
وأوعوا تخافوا منهم لأنهم في النهاية جبناء بيضربوا ويجروا أو يفجروا نفسهم عشان أسيادهم بيوعدوهم يراعوا أهاليهم وأولادهم وكمان جهلهم بدينهم بيخليهم عمي البصر والبصيرة
الطريقة الوحيدة إلي نطردهم ونقضي عليهم بيها هى القوة إننا مهما عملوا لازم نبين لهم إن أولاد مصر في رباط إلى يوم الدين
وإفتكروا إزاى إن مصر طول عمرها بتتعرض لشدائد وأوقات صعبة لكن بوحدتنا بنصد أى خطر
ياناس إوعوا تخافوا غير من ربنا وبس الإرهابيين دول بقنابلهم هما مجرد بشر ولو كنتم فعلا مؤمنين بالله يبقى لن يصيبنا إلا ماكتب الله لنا والله هو الحافظ الآمين ويحميكي يامصر ويحمي كل أولادك
ياأخواني وأخواتي أستحلفكم بأغلى عزيز عندكم الله يرضى عليكم إوعوا تضربوا في بعض وبدل ماترموا حجارة على الشرطة إلي بتحاول تحميكم وتحطوا سخطكم على الحكومة بلغوا عن أى حد تشتبهوا فيه خلونا نلفظ ونطرد ونضرب بإيد من حديد ونار على رقبة وإيد الإرهابيين الكفرة دول
يارب يهديكم ويحميكم ومصر تفضل دايما آمنة وقوية بيكم
الله يرحم كل الأبرياء والشهداء الذين قتلوا غدرا على أيدي هؤلاء الجبناء
الله أكبر على كل قاتل معتدي يارب يحميكي يامصر ويهدي أولادك ويحميهم بوحدتهم ويبعد عنا الفرقة والضعف يارب اللهم آمين
مصر هاتفضل غالية وآمنة ياإرهابي
Related posts:
