بسم الله الرحمن الرحيم وبه نستعين
تم نشر هذا المقال في جريدة الوفد بتاريخ 6 فبراير 2012 واللينك لنشر المقال موجود في اسفل الصفحة
رسالة مفتوحة لسيادة المشير محمد حسين طنطاوي
السيد المشير/ محمد حسين طنطاوي
تحية طيبة وبعد
أنا المواطنة ايمان نبيه وأكتب لكم بالنيابة عن شخصي وعن ناس كتير في مصر عندها نفس شعوري وتساؤلاتي ولكن عاوزة اسأل حضريتك الأول، هو سيادتك عايش معانا في مصر بردو ولا بره مصر؟
وسؤالي ياسيادة المشير مش غريب لأني إكتشفت ان القيادة العليا للقوات المسلحة الي حضريتك قائدها الأعلى اصبحتم بالنسبة لي ولكثير من مؤيديكم مجرد صفحة رقمية على مواقع التواصل الإجتماعي زي الفيس بوك على سبيل المثال
ومع ذلك ياسيادة المشير دخلت على كل بيان بتكتبوه على صفحتكم في الفيس بوك ودايما انا وغيري كتير بنكتب لكم ونستغيث ونصرخ ونسال ونتسائل لعل أدمن صفحتكم على الفيس بوك يتكرم ويتعطف ويوصل لكم صوت الناس الي بتساندكم وعاوزة تتكلم معاكم وتسمعونا ونسمعكم وفي الحقيقة ياافندم لا حد رد علينا ولا حتى قال لنا بعتنا لكم الرد في جواب بالبوسطة ويمكن يتأخر شوية واحيانا نجد مانكتبه قد تم ازالته من بند التعليقات
وعشان كده ياسيادة المشير بقول لحضريتك انكم اصبحتم مجرد صفحة رقمية على الفيس بوك ولا تفعل اي شيء غير اصدار بيانات وكأنكم لستم من البشر ولا تعيشون معنا على هذه الأرض
اسمه ياافندم موقع تواصل إجتماعي إلي هو الفيس بوك يعني الناس تتواصل مع بعضها البعض وهذا هو الهدف منه التواصل ياسيادة المشير بين الناس وبعضها يعني ارسال واستقبال
في كل مرة يحدث حدث جلل في مصر ننتظر ان يكون اول وجه نراه هو وجهك واول صوت نسمعه هو صوتك ياافندم هو حضريتك مدرك انكم بتخسروا تاييد ناس كتير كانت بتساندكم بسبب ردود فعلكم البطيئة وشبه المنعدمة تجاه شعب مصر؟
هل هانت عليكم الأغلبية من الشعب المصري لهذه الدرجة؟ هو حضريتك متصور ان الطريقة دي هي الحل الأمثل؟ هو احنا ليه منقدرش نقابلك و نكلمك ؟ حضريتك لو كنت نبي من انبياء الله كنا بالطبع نقدر نقابلك ولكن حضريتك مش نبي حضريتك الي في رقبتك أمانة شعب مصر كله ومع ذلك حضريتك للأسف في الزمن الي احنا عايشين فيه ده نشعر فيه بالقهر والذل والإستبداد والخوف من المستقبل من جانب كل من يتطاولون عليكم وبالتبعية يتطاولون علينا ووصل الأمر الى التهديد أيضا
يعني ايه المطلوب ياافندم؟ هل المطلوب اننا نتحول الي مواطنين مجرمين ومتطاولين وندعي لإسقاط مصر والي العصيان المدني في مصر ونعتصم عشان تسمعونا؟ يعني نتحول لمنافقين ومخربين ومجرمين ونخرج نحرق وندمر عشان تسمعونا ياسيادة المشير؟
احب اوصل لسيادتك ان الناس في مصر بتطلب منك او كانت بتطلب منك انك تخرج تقول الحقيقة عن الأحداث الي بتحصل في مصر ايا كانت، وكانت بتطلب كمان تشوف امام الشاشات بشر بشر زينا يافندم يسمعونا ويتكلموا معانا بالذات في الظروف الصعبة الي كانت محتاجة منكم انكم تتواصلوا مع الناس
ومهما كانت الحقايق والأسماء الي الناس عاوزة تعرفها هل انكم تقولوها خطر على مصر واخطر من الي بيحصل دلوقتي او ممكن يحصل؟
للأسف انتم بتخسروا مؤيديكم وللأسف بردو انتوا بتساعدوا في انتشار كل صوت عالي محرض متطاول بسبب ردود فعلكم وبياناتكم التي لا تسمن ولا تغني من جوع في ظل ظروف صعبة وحرجة للغاية لا يعلم مداها الا الله
خلاص ياافندم لا تقلق الناس دلوقتي مش عاوزاكم تتكلموا معها عارف ليه حضريتك؟ عشان انتم مش بتتكلموا ولا بتسمعوا بإنتباه غير الي بيتطاولوا عليكم وبيهاجموكم الي هما دلوقتي في حمايتكم اما احنا فالينا ربنا بقى هو اولى بينا
إنتم عفوتم عن ناس واستخدمتم سياسة الطبطبة معاهم مع انهم خالفوا القانون وعرضوا امن مصر للخطر ومازالوا ومؤكد سيادتك عارف انا اقصد مين طبعا من امثال اسماء محفوظ وعلاء عبد الفتاح ومايكل نبيل ونوارة نجم وغيرهم كتير الي مفيش عندهم شغل غير في التحريض والتطاول وبث الفتنة في مصر وطبعا معظم الإعلام المصري المنافق الي بيبث سمومه وتحريضه بردو وهنا عاوزة اسال حضريتك هو ليه انتوا قلقانين من احداث البلطجة والسرقة والخطف وغيره في مصر؟ هو حضريتك اكيد مدرك ان ده نتيجة طبيعية لأن البلطجة والسرقة وكل احداث العنف في مصر هو نتيجة ان الناس الي المفروض تطبق القانون للأسف مش بتطبقه على مخالفين القانون وده طبعا اعطى فرصة ذهبية للحرامية والمجرمين يعملوا كل الي هما عاوزينه
انا يا سيادة المشير بحملك مسئولية الأحداث الي بتحصل في مصر دلوقتي لأنها بسبب انكم مش بتطبقوا القانون على الي بيخالفوا القانون وعشان كده سقطت هيبة الداخلية وعاوزين كمان يسقطوا هيبة الجيش ومجلس الشعب وعمرهم ماهيرضوا عن اي رئيس منتخب هي دي الحقيقة للأسف هو سيادتك متخيل ان بعد انتخاب رئيس الدنياهاتهدأ؟ ابدا عمرهم ماهيرضوا غير عن الي هما عاوزينه مش الي الأغلبية عاوزاه
يافندم انا وغيري شعورنا ناحيتكم تمام زي الأم الي تدعي على ابنها وتكره الي يقول أمين ومازالت العلاقة دي موجودة مش عشان القوات المسلحة ولكن عشان الموضوع موضوع ايمان بمبدأ ولأني اعلم ان مصر هي الجيش والجيش هو مصر لو سقط الجيش او تم شق صفوفه تضيع مصر ونضيع كلنا معها
الجنود الي بيوقفوا على رجليهم سواء جيش أو شرطة وبيتعرضوا لإهانات ومؤامرات وهجوم وعنف هما في النهاية بشر زينا حضريتك مش قلقان انه ممكن يحصل شق في صفوف الجيش او الشرطة لاقدر الله؟
لما احنا شعورنا انكم لا تتعاملون مع الأحداث كما ينبعي بالذات في الأوقات الحرجة تفتكر حضريتك الجنود والشرطة شعورهم ايه؟
ياسيادة المشير ارجوك كفاية بيانات وكل شوية هانعلن عن الحقايق للشعب عشان الناس خلاص زهقت واتخنقت احنا سلمنا امرنا لله ياسيادة المشير وربنا يتولانا برحمته
لو حضريتك كنت خرجت وأعلنت وتواصلت مع الناس وقلت ايه الي بيحصل في مصر بالأسامي كنت هاتقلب الترابيزة على كل المحرضين ومثيري الفتن والوقيعة بين الجيش والداخلية والشعب
الي بينزل يتطاول وعاوز يحرق ويخرب ويدعي لعصيان مدني محدش بيقرب له بالعكس كله بياخد منه البركة وبيحميه ويقول معاهم حق يغضبوا ويتظاهروا حتى لو خالفوا القانون اي جنون هذا؟؟؟
اما الصوت الأخر هو الي بقى عدو وفلول وعبيد مبارك وعبيد بيادة الي اخره
انا مش عرفة انتم عايشين في اي كوكب ياسيادة المشير لكن ايا كان مكانه ارجوكم ماتنزلوش عشان تتكلموا معنا وتسمعونا عشان حقيقي الشكوى لغير الله مذلة
وعاوزة حضريتك تتأكد ان بالرغم من اننا نشعر بالذل والخوف والقهر والإستبداد واليأس والإحباط في هذا الزمان الذي اصبح فبه المنافقون المحرضون ابطالا إلا اننا أبدا لن نتحول مثل هؤلاء وسنظل نساند جيش مصر العظيم من اصغر عسكري إلي أكبر قيادة في المجلس الأعلى للقوات المسلحة
نحن لسنا من اصحاب الوصف الخبيث ان المجلس العسكري شيء والجيش شيء اخر لأن هؤلاء لا يهدفون إلا لشق صف الجيش ولست مضطرة ان اقسم بالله على مدى احترامنا وحبنا وتقديرنا لكم ولكن انا قلتها لكم مصر هي الجيش والجيش هو مصر إحنا ياسيادة المشير صعبان علينا نفسنا أوي أوي وخايفين على اولادنا أوي أوي وعارفين شعور امهات جنودك ورجال الشرطة الي بينزلوا من بيوتهم ومش عرفين هيرجعوا تاني ولا لأ نشعر بالعجز امام الأصوات العالية المحرضة وهناك من يحاربوننا ويرهبوننا من ان نتكلم ونعبر عن رأينا ويسبونا بابشع الألفاظ ويتوعودنا بالتهديد والوعيد
وعارفين ومقدرين إنكم تعملون تحت ضغط شديد وكان الله في عونكم لكن ياسيادة المشير انا حبيت الفت نظرك إنكم بتخسروا مؤيدين لكم لأنكم لا تتواصلوا مع ابناء الشعب المصري بالشكل المطلوب في ظل الظروف الحرجة الخطيرة التي نعيشها
اعتذر لأني لم استطع تذويق كلامي او ترتيبه في نقاط عشان انا عرفة اني لما اخاطب قائد القوات المسلحة لازم يكون باسلوب منمق وعلى اسس صحيحة معينة وارجو المعذرة وانك تسامحني لإني كتبت الي انا حاسة بيه ونقلته لك عن ناس كتير في مصر حاسة بيه زيي تمام
لنا ولكي الله يامصر
الفيديو التالي هو اهداء لكل من يشعر بالذل والقهر والإستبداد في مصرمن اصوات عالية متطاولة محرضة تعمل لليل نهار على اسقاط مصر ولا يطبق عليها القانون نحن الأغلبية الصامدة وليس الصامتة
والسلام عليكم ورحمة الله وبركاته
تم نشر المقال في جريدة الوفد بتاريخ 6 فبراير 2012 والتالي لينك لنشر المقال في جريدة الوفد
